US green card policy thar duan a ni; Mi tam tak an chiai

US President Donald Trump chuan kar liam ta khan thuchhuah thar siamin, US-a awm mek foreigners ten green card dil turin anmahni ramah an haw a ngai zel tawh dawn tih a puang. Trump-a policy thar hian US-a immigrants chengte a ti chiai hle a ni.

US-a cheng immigrant-te hian tun hma zawng chuan green card an dil dawnin US ram chhuahsan kher loin an awmna hmun atangin an dil mai thei thin a, he dan hi kum 70 dawn lai an lo hmang tawh a ni. Trump chuan sorkar dan hman lai mek chu rawn thlak dang lamin,tun hnuah chuan mi tupawhin US-a awmhlen leh hnathawh phalna green card a dil dawn anih chuan anmahni ramah an haw leh phawt a ngai a, anmahni ram embassy leh consulate kaltlangin chauh green card hi a dil theih tawh dawn a ni. Amaherawchu, sorkarin phalna danglam bik a pekte erawh chuan, US chhuahsan kher loin green card hi an dil thei ang tih dan thar chuan a tarlang tel thung.

Green card dil hian hun a duh a, awlsam taka neih zung zung theih a ni lo. Entirnan, US khua leh tui immediate family huangchhunga awmten green card hi an dil nghal theih lain, immediate family ni ve lo te tan chuan dil nghal mai theih a ni lo a, hun eng emaw chen nghah a ngai a ni. Chu mai piah lamah green card dilna thehluh hnuah hian thla 10 atanga kum eng emaw zat pawh nghah a la ngai thin a ni. Chumi awmzia chu, green card dil tura mahni rama an haw khan ‘dual intent visa’ an nei a nih loh chuan US-ah an lut thei dawn lo a tihna a ni a, mahni nupuitpasal, nu leh pa, fate nen kum tam tak inthen theihna chance a sang hle a ni. Hei vang hian Trump-a green card policy thar hian mi tam tak a ti mangang hle a ni.

Engtiang takin nge Indian a nghawng ang?

Policy thar hian US-a khawsak hlen tum Indian-te a nghawng thui dawn hlein a lang. Rampawn mi US-a hnathawh vanga pem tam ber chu Indian an ni. India mi green card neite chu embassy leh consulate kaltlang ni lo, US atanga green card dil an ni deuh fur hlawm a, Pew data in a tarlan danin kum 2024 khan Indian green card dawng zinga 61% chu US a cheng mek, US atanga dil an ni hlawm.

Hei bakah hian US-a hnathawk tam tak khu H-1B visa (hnathawh phalna visa) hmanga US khawsa mek an ni a, US chhuahsana green card an dil chhung hi a lo rei viau chuan sumdawnna, hnathawhna leh chhungkua nghawng hle dawnin a lang.