Donald Trump rorelna hnuaiah dan loa US luh tum an tlahniam

Custom and Border Protection in a tarlan danin tun hnaiah nasa takin dan loa US ram luh tum an tlahniam a, dan loa lut man pawh an tlem tawh hle a ni. CBP hotute chuan he thu hi ‘International reporting tour’ program-a khawvel ram hrang hrang aṭanga media mi kalkawmte briefing an neihah an sawi. Heihi a chhang tam tak zingah President Trump-an US chhim lama dan loa US lut nasa chu ‘national emergency’ a ni tia thupek a chhuah chu a bulpui ber niin a ngaih theih.

Mexico ram aṭanga dan loa US rama luh tum hi an thahnem ṭhin hle a, kum 2025 hma lamah phei chuan nitin mi sang chuangin dan loin ramri kan tum man ṭhin angin CBP- chuan an chhinchhiah. Kum 2025 february thla, Trump-an border venhim chungchanga thupek thar a tihchhuah aṭanga a thla khatna chiahah khan border patrol-te chuan chawhrualin ni khata an mi man zat chu mi 330 ah a thlahniam tih an sawi a. Kum 2026- ah phei chuan chawhrualin ni khatah mi 30 chauh an man tawh thu an sawi.

San Diego Chief Patrol Agent Justin De La Torre chuan dan loa luh tum tlakhniam chhan hrang hrang a sawi zingah a bul ber chu policy thar vang a nih thu a sawi a, kum 2025 hnulamah hian nasa takin ramri venhim hi ngaihpawimawh zual a nih thu a sawi a, chumi tur chuan hmanruate pawh tihchangtlung a nih thu a sawi. Hei bakah hian dan thar hnuaiah dan loa ramri luh tumte tun hma aiin an man hnem tawh zawk a, man an nih rualin thawn kir leh nghal thuai an ni hian dan loa luh tum a ti tlem tih a sawi bawk.

Dan loa ramri kan hi thil hlauhawm tak a ni a, ramri kan tur hian smuggler rawih ṭhin niin, pawisa tam tham tak an laksak ṭhin. Smuggler te tan chuan ramri kan tumte hi sumdawnna mai an ni a, an himna lam an ngaihtuah ngai lo. Pawisa an hmuhna tur anih chuan dik lo takin US an hruai luh ngei tur thu an tiam ṭhin a, nunna tana hlauhawm tak takah te an dah ṭhin a ni. Hei vang hian ramri kan tum nunna chan ta te pawh an awm fo thin. Dan loa lo lut turte kan dang hian ramri kan venghim ringawt a ni lo a, nunna tam tak kan chhanhim tel a ni tiin Torre chuan a sawi.

Sorkar hi inthlak ta se, tun hma ang bawk khan dan loa pem an pun leh hluai a hlauhawm tih zawhna chhangin CBP office pakhat chuan thil awm thei tak a ni a, mahse kalphung mumal tak duan a nih tawh chuan, chhunzawm zel a harsa tawh lo ang, a ti a; Tun hma ang em em chu a nih tawh loh an rin thu a sawi.