Spain-ah khualzin an pung

Middle East buaina avangin kuminah Europe ramah khualzin an pun phah hle a, Spain ramah April thla chhung khan ram dang aṭanga tlawhtu mi mtd 9.1 an awm. Kum 2025 April thla aiin khualzin hi 5.2% in an tam zawk a ni.

Hetih lai hian March thla chhung khan Dubai tlawhtu khualzin chu 66% in a tlahniam thung. Iran war avangin Middle East ram dang, Turkey leh Cyprus ah pawh khualzin hi an tlahniam hle.

Spain ram GDP-ah tourism hian a thawh hlawk hle a, 13% vel a tling a ni. Tun hnaiah tourism industry a ṭhang chak hle a; France, Germany, Italy leh UK te an lehpel tawh a ni. Kum 2025 khan khualzin tlawhtu hi mtd 97 an tling. Khawvel huapa tourist destination lian ber dawttu ni mekin, France dawtah a awm a, kuminah France hi a lehpelh theih rin a ni bawk.

Hetih lai hian ram dang khualzin tam lutukin an environment lama nghawng a neih avangin tualchhung mi tam tak chuan an duh lo hle thung. Kum 2024 aṭang khan Barcelona leh tourist hub dang, Balearic Islands leh Canary Island-ahte khualzin tam vanga lungawi lohna lantir an awm fo a ni. YouGov in mipui ngaihdan a lakah, Spain mipui 28% chuan foreign tourism chuan an ramah nghawng ṭha lo a nei niin an ngai. Kum 2016 hma lamah chuan tourism chu an ram economic sector tana thil ṭha tak nia an ngaih laiin, hemi hnu lamah chuan khualzin lut tam lutuk chuan tualchhung mite khawsak phung thlengin nghawng ṭha lo a nei tel niin an ngai a ni.