Trump-a’n secretary of state atan Rex Tillerson a thlang

US President-elect Donald Trump chuan Exxon-Mobile chairman leh chief executive ni bawk Rex Tillerson chu secretary of state atan a thlang.

New York Times chuan secretary of state atana Rex Tillerson thlan a nih thu hi a ziak a, he hna chelh tura rinkai dang, Masschusetts governor hlui Mitt Romney, sipai hotu hlui General David Petraeus leh Tennessee Senator Bob Corker-te chu te≠lephone hmangin, Tillerson thlan a nih thu hi hrilh an nih thu a tarlang bawk.

Trump-a transition team chuan Thawhlehni khan Tillerson chungchangah hian thuchhuah a lo siam tawh a, geopolitics lama hriatna thuk tak a neih te, a tawnhriat neih ṭhatte chu secretary of state dinhmun chelh tura thlanna tur chhan ṭha tak a nih thu a lo sawi tawh a ni. Transition team chuan, Tillerson chuan ram dinhmun ngelnghet siam leh, US himna chu a ngai pawimawh ber a ni, an ti.

Tillerson chuan chanvo pawimawh tak chelh tura thlan a ni chu lawmawm a tih thu sawiin, Trump-aín ramdang nena inlaichinna tura ruahmanna a a neihte leh, ram himna kalpui dan tura hmathlir a neihte chu a ṭawmpui thu a sawi.

Hetih lai hian party pahnih-a politician-te chuan Tillerson hi Russia nena inzawmna ṭha tak nei, Russia President Vladimir Putin pawh ṭum eng emaw zat lo hmu tawh a nih avangin secretary of state atana thlan a ni an ti a, hemi chungchangah hian ngaihṭhat tawk lohna an neih thu an sawi. Kum 2013 khan Putin chuan Tillerson hi energysection lama thawhdunna tichak tura a hnathawh avangin Russia chawimawina, Order of Friendship a lo hlan tawh a ni.

Donald Trump chuan U.S. Department of Energy hotu atan Texas Governor hlui Rick Perry a thlang bawk. Thawhṭanni zan khan president-elect leh Perry hi New York-a Trump Tower-ah an inkawm a, hemi hnu hian energy secretary atana thlan a nih thu hi puan a ni. Interior secretary atan US Representatvie Cathy McMorris Rodgers chu thlan a ni bawk.

Trump-aín a secretary tur atana a thlante hi Senate-in a pawmpui leh phawt an ngai dawn a ni.