Russia-a eptu hruaituin president chuh tum

Russia-a eptu pawl hruaitu, Alexei Navalny chuan kum 2018-a an ram president thlanna neih hunah chuh a tum tih a sawi.

Kum 40 mi, Russia Anti-Corruption Foundation dintu Navalny chuan, Russia ramah hian kum 20 chhung chu inthlanna an neihah inelna tak tak a awm tawh lo niin a sawi. President Vladimir Putin-a kaihhruai sorkar-a official-te chu thamna sum la leh, sorkar sum te eiruah a puh bawk.

Hetih lai hian Kirov bial-a court chuan kum 2013 khan Navalny leh a thurualpui chu timmber firm sum tihchingpenah puhin, kum nga tang turin a hrem. Mahse Navalny hian a appeal hnuah a hremna hi hlih a ni. Navalny chuan thubuai an siamsakte chu politics lama an beihna a nih thu a sawi. Kum 2013 khan Navalny hian Moscow mayor thlannaah a lo chuh tawh a, a chak zo lo a ni.