Brazil-ah Senate-in bill pawm vangin buaina chhuak

Brazil Senate chuan an rama inrenchemna kalpuina tur bill chu a pawm a, hei hi mi tam tak chuan duh lohin an ram khawpui Brasilia leh khawpui dangahte buaina a chhuak.

Senate-in bill a pawm tak hi an ramin sum lama harsatna a tawh mek phuhrukna kawng khat atana kum 20 chhunga sorkar sum hman tihtlemna tur a ni. Eptute chuan bill hi duh loin, pawm a nih chuan health leh education sector-in a tuar nasa dawn niin an sawi.

Parliament, National Congress-a bill ngaihtuah a nih lai hian bill duh lotute chuan pawn lamah bill duh lohna an lan tir a, Senate-in a pass tih an hriat hnuah hmun tam takah tharum thawhna a thleng zui a ni.

Brasilia-ah chuan lungawi lohna lantirtu ten bus an hal a, kawng an zawh bawk. Mahse riot police-te chuan kawngzawhte hi an lo dang a ni. National Congress building kawtah buaina a chhuak bawk.

Bill pass tur hian sorkar chuan Senate-a seat hmun ngaa ṭhena hmun thum, senator 49 thlawpna a neih a ngai. Vote laknaah hian bill thlawptu lamah vote 53 tlain, a duh lo lamah vote 19 chauh a tla a ni.