Khawvel Lawrkhawm

Poland-ah US sipai 4,000 dah dawn

US senior commander Lieutenant General Frederick Hodges chuan kum 2017-ah Poland ramah US sipai 4,000 dah an tum tih a sawi a, motor leh hmanraw dang eng emaw zat dah a ni bawk ang.

Hodges chuan sipaite chuan nakkum kumtirah Germany an thleng ang a, heta ṭang hian Poland an pan dawn tih a sawi. Sipai dah an nih chhan chu Europe-ah boruak muanawm a awm theihna tur a ni tih a sawi bawk. Kumin July thlaa Warsaw summit-ah khan NATO hruaitute chuan Baltic ram pathum leh Poland dramah sipai battalion khat ṭheuh dah an lo remti tawh bawk a ni.

Greece-ah kum 2,500-a upa khawpui hmuchhuak

Greece ram laili laiah kum 2,500-a upa khawpui hmuchhuah a ni.

Sweden-a University of Gothenburg leh UK-a Universityof Bournemouth-a archaelogist-te chuan hmanlai khawpui hi Athens hmarlama Vlochos khuaah an hmuchhuak. Khawpui hlui hi Thessaly biala Strongilovouni tlangah hmuh a ni a, tlang bulṭhutah hian tower, wall leh city gate chambang ṭhenkhat hmuh a ni. Hlum aṭanga thil siam leh pawisa thirte pawh hmuh tel a ni bawk. An thil hmuhchhuah aṭang khan he khawpui leh Greece ram chanchin pawh an chhui thei dawn niin an sawi.

Lu khuhna tel loa thlalak dah vang-in Saudi hmeichhia man

Saudi Arabia-a hmeichhe pakhat chu a twitter account-ah a lu khuhna puan, hijab telloa a thlalak a dahchhuah avangin police-teín an man.

Hmeichhia an man hi a hming puanzar a ni lo a, kum 20 bawr vel a ni. He hmeichhia hian Riyadh cafe bula a lu khuhna telloa thla a lak chu a twitter-ah a dahchhuak a, Thawhṭanni khan police-teín an man ta a ni. Police thupuangtu, Fawaz al-Maiman chuan, he hmeichhia hian inkaihhruaina dan a palzut niin a sawi a, pawn lamah a laina hnai nilo mipate chu a bia niin a sawi bawk a, hei hi danin a khap a ni, a ti. Saudi hmeichhiate hi pawn an chhuahin an lu tuam tur leh, thawmhnaw pawh thawl ṭha tak inbel tura tih an ni.