Pakistan-in Afghanistan a beihnaah naupang 11 an thi

Afghanistan sorkar chuan Thawhlehni zan khan Pakistan-in an ram beiin mi 13 an thi a, thi zinga naupang 11 an tel tih an sawi. Afghanistan sorkar thupuangtu, Zabihullah Mujahid chuan Pakistan sipaite hian Khost, Kunar leh Pakita province an bei tih sawiin, an beihpui thlaknaa naupang thi thlalakte pawh a tarlang a ni.

Mujahid chuan zan rei lamah an mut tawh hnuah civil mite chenna hi beih a ni tih a sawi a, mi 13 an thih bakah hliam tuar 14 an awm thu a sawi. Hemi chungchangah hian Pakistan lam chuan sawi an la nei lo a; mahse, Afghanistan ram aṭanga an ram beitu firfiakte chu an bitum tur thu a lo sawi fo tawh thung.

February thla tawp lama ram pahnihte inkara inbeihna a thlen hnuah, tun ṭum hi an inbeih lehna nasa ber a ni. Kum 2021-a Taliban-ten Afghanistan-a thuneihna an chan hnuah, Pakistan nena an inkar boruak hi a chhe chho hle a ni. Pakistan sorkar chuan firfiak pawl, Pakistani Taliban, Tehrik-e-Taliban Pakistan chu Afghanistan sorkar hian a thlawp niin a puh a, mahse Aghanistan official-te chuan Pakistan puhna hi an hnawl a ni. Thawhlehni zana Pakistan sipaiten airstrike an neih hma ni hian Pakistani Taliban nia hriatte chuan Pakistan hmarthlang lam, Khyber Pakhtunkhwa province-a Hasan Khel area-a security post an bei a, sipaite nen inkapin Federal Constabulary member paruk an thi tih Pakistan Interior Ministry chuan a sawi. Security force-te hian firfiak pariat an kaphlum ve bawk.