US House-in immigration enforcement tan USD tld 70 bill

US House of Representative chuan Thawhlehni khan ram dang mi, dan loa an rama lutte khauh zawka khuahkhirhna tura hma lakna tura dollar tld 70 zet hmanna tur Bill a pass. He Bill hi president Donald Trump-a hnenah a pawmpuina la a, a hming ziak tura thawn a ni. Hemi hmang hian Trump chuan a term neih chhunga ram dang mi hnawhchhuah a tumna, deportation agenda chu a tichak thei dawn a ni.

Republican member tam zawkin bill hi an thlawp a,Democrat-ten nasa taka an dodal chungin 214-212 in a tlang a ni.Bill hmang hian Homeland Security agency pahnihte chu kum thum chhung thuam chakna tur sum pek an ni ang.

White House chuan bill-ah hian Immigration and Customs Enforcement (ICE) tan USD tld 38, Border Patrol tan USD tld 26 leh beisei loh thil thleng thuta hman atan USD tld 5 ruahman a ni tih a tarlang. Kum tina hman ṭhin sumte chu a hma lama hman theiha ruahman (front-load) a nih avangin, Trump kaihhruai sorkarin an rama dan loa pem lut kum khata mi maktaduai khat (1 million) vel hnawh chhuah a tumna kawngah sum harsatna awm loa kalpui a nih theihna tura siam a ni.

Republic lam thunun, Congress chuan nikum khan ICE leh Customs and Border Protection tan USD tld 140 dawn fund a lo pe tawh bawk. Hei vang hian Democrats lam chuan agency-te tana sum pek belh hi an dodal a, Democrats hruaitu Hakeem Jeffries chuan Republican lam chu America mipui lam dah pawimawh hmasa loah a puh.