SKorea President hlui kum 30 tang tura hremna pek belh

South Korea court chuan nimin khan an ram president hlui, jail-a tang mek Yoon Suk Yeol chu kum 2024-a North Korea rama drone a tirh lut avangin kum 30 tang turin hremna a pek belh.

Prosecutor-te chuan Yoon hian kum 2024 December thlaa an rama martial law puan a nih theihna tura chhuanlam siamna atan, North Korea nena an inkar boruak chawk buai turin hemi kum October thla hian North Korea khawpui, Pyongyang hmar lamah drone a tir lut niin an sawi.

Kum 2024, December 3-a Yoon-a'n martial law a puan khan, an ram tichhetu leh NKorea thlawptu "anti-state" lakah ram venhimna atana puang a nih thu a sawi. Mahse, martial law a puan hi politics-a a dinhmun chhiat vang zawka puang a ni tih hriat a ni a, mipui nawrna nasa tak avangin a thupek hi rei lote hnuah a hnukdawk leh nghal a ni. Yoon chu President a nihna aṭanga bantir a ni zui a, hei bakah martial law a puan chungchangah thubuai siamsiakin dam chhung tang tura hrem a ni bawk. Jail-ah a tang mek a ni.

Seoul District Court chuan Yoon bakah a defense minister hlui Kim Yong-hyun, Defense Counterintelligence Command hotu hlui Yeo In-hyung leh Drone Operations Command hotu hlui Kim Yong-dae te chu ram phatsan leh thuneihna dik lo taka hmanga puhnaah thiam loh chantirin tang tura hrem an ni bawk.

Court chuan, "Hremna pekte hian sipai hmalakna hming hmangin NKorea cho chhuah a, emergency puan theihna tur dinhmun siam an tum a ni," tiin a tarlang.

Hetih hian Yoon-a laywer-te chuan NKorea lam hian SKorea ramah bawlhhlawh dah khawmna balloon tam tak an thlawh luh tir avangin hetianga ti hi a nih thu leh, Yoon thiltih chu tihawm tak a nih thu an sawi thung. Yoon pawhin drone a tirh chungchangah tihsual a nei lo tih a sawi ve bawk.