Fund dah tlem vangin UK Defence Secretary a bang

Britain defence secretary John Healey chu prime minister Keir Starmer kaihhruai Labour sorkarin defence tana fund a dah tlem avanga lungawi loin a bang.

Healey chuan Defence Investment Plan (DIP) kaltlangin defence lam tan investment tam zawk an mamawh a; hei hi Labour sorkar ngei pawhin a pawm a ni, a ti. Mahse, heti chung hian PM Starmer chuan a tipuitling thei lo a, Treasury lam chuan an mamawh ang zat fund pek hi an hreh tlat a ni, tiin banna lehkha a theh luhah a tarlang.

West Asia buaina leh thil dang dang vangin defence lam sum mamawh chu kumin January thla aṭang khan a sang chho zel tih Healey chuan a sawi. US president Donald Trump nawrna avangin NATO ram dangte ang bawkin defence tana sum sen chu kum 2030-ah GDP aṭangin 3.0% leh 2025-ah 3.5% a tihpun a lo remti ve tawh bawk. Defence tana sum mamawh chungchangah defence leh finance minister-te chu hun rei tak an lo inbe tawh a, Thawhṭanni khan an sum ruahman zat hi tifelin Healey chuan an mamawh zat a pha lo hle tih a sawi. An mamawh ang fund pek an nih loh avangin an sipaite leh an ram himna pawh a tiderthawng thei tih a sawi a, thutlukna a siam mai a ngai tih a tarlang.

PM Starmer duh khawp lohna avangin Labour sorkar chhungah buaina neuh neuh a awm chho fo a, May thla khan health secretary Wes Streeting chu a lo bang tawh bawk.