China-ah North Korea hotu Kim Jong-un a zin

North Korea ram hotu lu ber Kim Jong-un chu puangzar lawk awm loin Thawhṭanni khan China-ah a zin a, January 10 thleng a cham ang. Kim hi a nupui Ri Sol-ju chuan a ṭawiawm a ni. 

Nimin khan NKorea leh China media-te chuan China rama Kim zin thu hi an tarlang a, nimin zing khan Bejing-a rel station-ah Kim phurtu rel hi a thleng a ni. He rel hi Kim-a'n China a tlawh hmasak ṭum pawhin a lo hmang tawh a, a pa Kim Jong-il-a'n kum 2011-a China leh Russia a tlawh ṭum pawh khan a lo hmang tawh bawk. 

Kim Jong-un hi official eng emaw zatin an zui bawk a, tun ṭum hi kum khat pawh tling loa China ram a tlawh vawi li-na a ni a, nikum khan ṭum thum thum a zin hman a ni. Heng a zin turte hi a hmaa puanzar lawk a ni ngai lo. 

Nimin kha Kim-a piancham vawi 35-na nia sawi a ni bawk a, mahse a pianni tak hi NKorea hian a la sawichiang ngai lo thung. 

China hi NKorea ram ṭhianṭha tak a ni a, sumdawnna lama a thawhpui lian ber zinga mi a ni bawk. 

Hetihlai hian Kim Jong-un leh US President Donald Trump-te summit neih leh tur chungchang ngaihtuah mek a ni. US State Department official-te chuan tunhnaiah NKorea official-te chu ṭum eng emaw zat hmuin, summit neih leh dan tur hi an sawipui a ni. Official-te chuan summit vawi hnihna neih tur chungchang hi Vietnam khawpui, Hanoi-ah an sawiho a, hei vang hian ram pahnih hruaitute inbiakna hi Vietnam ram hian a thleng maithei nia rin a ni. 

President Trump pawhin summit neih leh hun tur hi puan thuai a ni dawn tih a sawi a, NKorea lamin inhmuh an duh a, anni lam pawhin an lo duh ve bawk a, thil awmdan tur tihfel thuai a ni ang, a ti.