Bangladesh PM atan Sheikh Hasina lalut

Sheikh Hasina chu Thawhṭanni khan a ṭum li-na atan Bangladesh Prime Minister atan rinawmna thu tiamtir lakluh a ni. 

Kum 71 mi, Hasini-i kaihhruai rorellai Awami League party leh a thawhpuite chuan nikum December 30-a inthlanpui neihah Parliament seat 300 awmah seat 288 an la a ni. He inthlanah hian eptu pawl lian ber chuan seat sarih chauh a la pha thung. Eptute chuan inthlanah hian vote tihchingpen a nih thu sawiin, inthlan result hi an pawm lo tih an sawi. 

President Abdul Hamid chuan presidential palace, Bangabhaban-a PM thar lakluh inkhawm hi kaihruaiin, Hasina-i hi rinawmna thu a tiam tir a ni. PM rual hian a cabinet member 47 pawh lakluh nghal an ni bawk.

Kum 1981 khan sipai officer helten Hasina-i pa, Bangladesh president hmasa ber Sheikh Mujibur Rahman, a nupui leh a fapate pathum an kaphlum a, hetihlai hian Hasina-i ram pawnah a awm a ni. Kum 1981 khan Bangladesh-ah kirin Awami League hruaitu dinhmuna chelh zui a, an rama democracy tundin tumin theihtawpin a bei zui nghal a ni. Kum 1990 khan Hasina-i hian military dictator Hussain Muhammad Ershad paihthlak a nih theihnan Khaleda Zia-i party, Bangladesh Nationalist Party (BNP) chu a pui a, mahse a hnu lawkah Zia-i nen hian an thawhdunna hi an titawp zui a ni. Kum 30 chhung Zia-i  nen hian politics lamah an inbei zui tawh ni. 

Kum 1996 khan Hasina-i hi a ṭum khatna atan prime minister-ah thlan a ni a, mahse kum 2001 inthlanah erawh a chak zo lo. Kum 2008 December inthlanpuiah hneh takin thlan tlin a ni leh a, hmei hnu hian thuneihna hi a la chelh chhunzawm reng a ni.