France-in dan loa nawrh huai-hawtte hrem tur thu puang

France Prime Minister Edouard Philippe chuan sorkar laka lungawi lohna lantira nawrh huaihawt, Yellow Vest tia sawiten kar sarih chhung zet nawrh an huaihawt hnuah, dan loa nawrh huaihawtte hremna tur ruahmanna a puang. 

France sorkar nawrh huai-hawtna hmuna hmaituamte leh buaina chawk chhuak ṭhinte khapna leh hrek an nih theihna tur dan siam a duh tih a sawi bawk. 

PM chuan Yellow Vest-te nawrh huaihawt lehna tura pawh venhim hna thawk turin security force 80,000 vel zet dah an nih tur thu a sawi. 

Yellow Vest-te hian kar sarih chhung chu kartinin kartawpah nawrh hi an huaihawt ziah a, kar kaltaa nawrh huaihawtte sorkar office gate-te tichhiain buaina an siam a, Paris khawpuiah riot police-te nena intibuaiin, car leh bike-te an hal bawk. 

Nikum November 17 khan sorkarin fuel tax tihsan a tum duh lohna lantirin nawrh hi huaihawt ṭan a ni a, hun eng emaw chen an nawrh hnuah sorkar chuan fuel tax tihsan a tumna chu a sut a ni. Mahse hemi hnu pawh hian nawrh hi titawp mai loin, sorkar lakah an lungawi lohna hrang hrangte lantirin an nuar chhunzawm zel a ni. Nawrh huaihawtna hrang hrangah tharum thawhnate thlengin thil tam tak an tichhiai a, buaina chhuak vanga thi hi mi paruk an awm tawh a, mi 1,400 velin hliam an tuar tawh bawk.