July thlaah Iran Supreme Leader hlui vui dawn

Iran state news agency, IRIB chuan an ram hotu lu ber, February 28-a US leh Israel-in an rama beihpui an thlakna avanga thi, Supreme Leader hlui Ayatollah Ali Khamenei thlahna leh vuina hun hman hun tur a puang.

US leh Iran ten inremna an siam thei dawn hnai nia sawi a nih hnuah, IRIB chuan Khamenei vui hun tur hi a puang a ni. July 4-5 hian an ram khawpui, Tehran-a Imam Khomeini grand Mosalla-ah mipuiten an ram hotu hlui thlahna hun hi siam a ni ang. July 6-ah vuina hi hman ṭan niin, hemi hnu hian Shia clerics tamna, Qom-ah a ruang hi kalpui a ni ang a, a pianna khua Mashhad-ah kalpui leh a nih hnuah July 9-ah a vuina hnuhnung neih a ni dawn a, Shia ho hmun thianghlim, Imam Reza Shrine-ah phum a ni ang. February-a beihpui thlaknaa thi - Khamenei fanu leh makpa te pawh vui an ni dawn a ni.

Khamenei hi a thih khan kum 86 mi a ni tawh a, kum 1989-a Ayatollah Ruhollah Khomeini a thih khan, hun rei tak chhung Iran ram hotu lu ber dinhmun hi a chelh a ni.A thih hnuah a fapa, Mojtaba Khamenei chu a pa thlaktu atan hian ruat a ni a, mahse hemi hnu hian mipui hmunah a la inlan lo.

Commemoration Committee for the Bloody Ascension of the Martyred Militant Imam chuan Khamenei vuinaah hian Iran mipui bakah ram hrang hranga mite pawh tel turin a sawm. Hun hman dan tur kimchang pawh tihchhuah a la ni dawn tih a tarlang bawk.