Switzerland-in an ram mipui mtd 10 china bithliah rawt

Switzerland-a right-wing Swiss People's Party, SVP hmalaknaa an ram mipui, mtd 10 china bithliah tura danpui siamṭhat rawtna chungchangah nimin khan mipuiten vote an thlak.

Ram dang aṭanga pem lutte chungchanga lungkhamna leh, vantlang rawngbawlna hna leh chenna in tawt chho zel avanga nawrna avangin, SVP chuan ram danpui thlak an rawt a ni. Kum 2050 thlen hmain Switzerland mipui zat chu mtd 10 aiin an tam tur a ni lo tih a phut (mandate) a ni. Sorkar lamin a thlir lawknaah 2040 hmain hemi zat hi an tlin hman an ring a ni.

He thil rawt chhuah a nih chhan chu kum 10 kalta chhunga mipui dinhmun danglam nasa tak vang a ni. Switzerland mipui zat hi 2025 kumtawp khan kum sawm chhung khan 10%-in an pung a, mtd 9.1 chuang hret an tling a ni. An chanchin chhinchhiah tawhah a vawi khatna atan, kum 65 chunglam zat chu kum 20 hnuailam aiin an tam zawk. Nau piang zat te pawh an tlahniam bawk.

Sorkar official data tarlan danin, kum 2024 tawp khan mipui za zela 41% chu an rama pem lutte thlah an ni a, ramchhunga cheng nghet, permanet resident zinga 32.5% vel chu ram dang aṭanga pem lut hmasa ber (first-generation immigrants) te an ni. European Union (EU) khua leh tui mtd 1.4 vel chu Switzerland-ah hian an cheng a, hei hi mipui awm zat aṭanga 16% vel an tling. Hei bakah mi nuai 3.4 vel chu ni tin hna thawk turin ramri kaltlangin an lut ṭhin bawk a ni.

Direct democsracy system hnuaiah, Switzerland mipui hian dan siamṭhat tur chungchangah kum khatah vote vawi li an thlak ṭhin a,mahse thlak tur hian mipui tam berin an thlawp a ngai a ni. Tuna mipui awm zat bithliah rawtna hi sorkar leh parliament chuan a thlawp lo.