Oil leh gas supply pangngai nan hun la duh dawn

Iran indona tihtawp leh Strait of Hormuz hawn lehna tura inremna siam remtih a nih thu puang mah se, oil leh gas man sang leh energy supply lama harsatnate chu thawk leh khata sut kian mai theih a ni dâwn lo.

Energy expert-te chuan energy company-te'n khawvêl ram hrang hrangte mamawh phuhrukna tura hna thawh leh theih nân thla eng emaw zât an la duh dawn tih an sawi. Buaina chhuak hian oil phur chhuah tur tam ber a dan chah tawh avang leh, Strait him leh him loh chungchanga rinhlelhna a awm avangin inremna siam pawh ni se a nghawng hi a lang chhuak nghal mai dawn lo nia sawi a ni.

Oil phur lawng tam tak chu thla thum chuang Persian Gulf-ah an lo tang tawh a, he tuipui kawng hi him taka an paltlang theih loh avângin an chhuak thei lo a ni. Indona thlen hma khan Strait of Hormuz hi khawvêla oil leh gas mamawh hmun ngaa ṭhena hmun khat vêl kal tlangna a ni ṭhin.

S&P Global Energy-a fuels leh refining research hotu Daniel Evans chuan, "Mipuite an thla a muan leh insurance-te a fel leh nân hun a duh dâwn a ni. A bîk takin, he hna thawh nâna hmanruate ti nung leh tura mipuite an kir leh nân hun a duh dâwn a ni," a ti.

Evans chuan a hmasa berah tangkhang mek lawngte chu an chhuah hmasak a ngai ang a, chumi hnuah oil phur tura lawng tharte (tankers) an luh leh a ngai dawn tih a sawi. Oil phur lawngte hi an kal muang hle a ni tih sawiin, tuipui aṭanga ram hla tak tak thleng tur hian thla eng emaw zât a duh dâwn a ni.

Hei bakah Middle East-a oil siamtu ṭhenkhat chuan buaina thleng vang hian an hna thawh pawh hun rei tak an lo chawl tawh a, an hna ṭan ṭhat leh chu thil hmanhmawh vut vut theih a ni lo bawk a ni, a ti.

Expert-te chuan oil siamtu ramte chuan Strait chu a him ngei dawn em tih leh, inkahhai puan chu ni 60 vel aia rei a daih dawn tih an hriatchian hma chuan oil siam chhuah hna chu an ṭan leh mai duh dawn lo niin an sawi bawk. Hei vang hian oil leh gas supply chungchangah dan anga kalpui leh tur chuan nghah deuh a la ngai dawn tih an sawi a ni.