Swiss voter-ten ram mipui zat bithliah tumna hnawl

Switzerland-a mipui awm zat bithliah tumna dan siamṭhat rawtna chu mipuiten an hnawl.

Right-wing Swiss People's Party in kum 2050 thlen hmain Switzerland mipui zat chu mtd 10 aiin an tam tur a ni lo tia dan siamṭhat an rawt chungchangah, Pathianni khan mipuiten vote an thlak a ni. Mahse, vote thlak zinga 55% dawnin he rawtna hi an hnawl a, a thlawp lamah vote 45% a tla. Pathianni vote laknaah hian vote nei zinga 60% velin an thlak a ni. An khawpui, Bern ah chuan rawtna duh lotu hi 84% dawn an tling. Vote thlaknaah hian Swiss citizen chauhin vote an thlak phal a ni a, mahse khawpui tam takah chuan ram dang aṭanga pem lut an tam tawh hle a ni.

Rawtna siamtu, Swiss People's Party chuan an ram mipui awm zat bithliah siam an rawt chu mipuite tana rawngbawl hna thawhna leh environment venhimna tur niin a sawi. An party hi ram dang aṭanga pem lut pung zel thlawp lotu niin, an dodalna pawh an lo lantir fo tawh. Ram dang aṭanga pem lutte chu khawtlanga harsatna leh buaina thlentuah an puh fo a ni.