UK-in kum 16 hnuai lam tan social media khap dawn

Britain prime minister Keir Starmer chuan an ramah naupang kum 16 hnuai lam tan social media khap a ni dawn tih Thawhṭanni khan a puang.

Downing Street-a press conference a neihah, Starmer chuan sorkarin kum 16 hnuailam naupang zawng zawngte tana social media hman a khap tur thu a sawi. Naupangte an online laia an himna leh an rilru hriselna lam venhimna turin social media kaihhruaina dante chu nasa taka siam]hat a tum thu a sawi bawk.

"Ka ngaihdanah chuan khap hlen hi thutlukna dik a ni," a ti a, thil awlsam tak a ni dawn lo tih sawiin,hemi rual hian technology company lian tak takte nawr turin sorkar chuan thuneihna leh theihna a nei a ni, a ti.

Britain hi tun hnai kum rei vak lo aṭang khan technology company-te lakah a khauh chho hle. Kum zat finfiahna (age verification) hman te, an algorithm siam rem te, leh naupangten mobile phone-a saruak thalak an thehdarh lohna tura hma lak chungchangah company lamte a nawr nasa hle. Naupangten online-a hun an hman rei lutuk hian rilru lam hriselna atan hlauhawm a thlen thei tih hriat chhoh a nih hnuah Starmer hian nasa zawka hma la turin thutlukna a siam a ni. He thutlukna a siam hma hian nu leh pate a kawm a, nikum December thla aṭanga Australia-in kum 16 hnuailam tana khapna a lo kalpui tawh dante a thlir hmasa bawk.

Australia-in nikum December-a kum 16 hnuai lam tana social media platform hrang hrang; TikTok, YouTube, Instagram leh Facebook te pawh huama khapna a siam hnuah, ram eng emaw zat chuan naupangte hriselna leh himna atana social media khapna leh khuahkhirhna siam chungchang hi an ngaihtuah zui a ni. Britain sorkar pawhin khapna siam tum chungchangah nu leh pa bakah zirtirtu leh nauopangte pawh a kawm kual nasa a ni. An mi kawm zinga 90% chuan social media platform hman phalsak chin atana kum 16 chin bihthliah chu ṭha an tih thu an sawi. Nu leh pa 83% chuan social media chuan naupangin an ṭangkaipuina aiin an tana a hlauhawmna a nasa zawk tih an sawi a ni.