Myanmar President-in China a tlawh

Myanmar president Min Aung Hlaing chu ni nga cham turin Thawhṭanni khan China a thleng. A cham chhungin China president Xi Jinping leh hruaitu dangte kawmin, China-Myanmar inlaichinna ṭha leh nghet zawk siam dan tur a sawipui ang.

China a tlawh hmain Min hian May 30 khan India a tlawh a, June 3 thleng a cham. President atana thlan tlin a nih hnua ram pawn lam a tlawhna hmasa ber a ni a, India prime minister Narendra Modi nen inkawmin, Myanmar ram leilung chu India beihna atana hman a remtih dawn loh thu a hrilh.

President Min-a'n China a tlawh hma hian Myanmar foreign minister Tin Maung Swe chu China-ah hian a lo zin tawh bawk a, China foreign minister Wang Yi nen an inkawm a ni. Minister pahnihte hian ram pahnih thawh dunna leh, Myanmar tana hmasawnna thlen dan turte an sawi dun a ni.

Nimin khan China chuan Myanmar President lawmna hi Great Hall of the People-ah a buatsaihsak a, hemi hnu hian Xi leh Min hi an inkawm nghal a ni. Xi chuan Myanmar nena inlaichinna ṭha tak an nei chu lawmawm a tih thu sawiin, ram pahnihte chu eng dinhmunah pawh an inthlawp ṭha zel dawn tih sawi. Myanmar rama party hrang hrangten boruak muanawm a awm theihna hma an lakna leh inbiakna an neihte chu China chuan a thlawp tlat a ni, a ti.