Vietnam-ah zawhte rukbo ṭhahnem tak chhan chhuak

Vietnam ramah ei atana rukbo, talh tura ruahman tawh zawhte 400 chuang chhan chhuah an ni. Thuneitute chuan zawhte rûk hmang pawl pakhat man chhuakin an pawl chu an ṭhiahsak tih ran humhalhtu pawl (animal welfare group) chuan an sawi.

Ho Chi Minh City police-te chuan zawhte rukbo kaihhnawihah hian mi pakua an man a ni. Vietnam-ah hian ui leh zawhte sa ei hi dan phal a ni a, mahse zawhte hralhtute chuan khawi hmun aṭanga an lak nge tih tarlanna, phalna lehkha an neih a ngai thung.

Kar kalta khan Tay Ninh Province leh Ho Chi Minh City-a hmun hrang hrang an dapnaah police-te chuan zawhte nung 400 chuang leh a thi tawh, vura vawm dah vawth, frozen 80 vel an hmu chhuak a ni. Hmun dang pakhatah zawhte 21 dang an man belh bawk.

Ho Chi Minh City-a ranvulh ruk bo a tam tak thut avangin police-te hian chhui hna an thawk a, June 11 khan zawhte ruk hmang pawl lian tak hi an chhui chhuak ta a ni. An pawl hian kum thum kalta chhung khan Vietnam chhim lam hmun hrang hrangah zawhte an lo la khawm tawh a ni. Chhuina aṭanga a lan danin, zawhte an rûkte chu dah khawmna hmunah hruaiin, ni hnih thum dan zelah sumdawngte hnenah an hralh chhawng ṭhin a ni.

Zawhte ruk bo tawh 40 vel chu an neitute hnenah hlan let leh tawh an ni tih Humane World for Animals thuchhuah chuan a tarlang. Kum tinin Vietnam ramahhian zawhte ui mtd 5 leh zawhte mtd 1 chu rukbo an ni ṭhin niin an sawi bawk. Heng ran vulhte hi a neitute in aṭanga rumbo an ni fo tih an sawi. Thuneitute leh police-ten ran nunna chhanna atana hma an lakna chu fakawm an tih thu an tarlang.