DR Congo-a Ebola hri lengin a la awh rei maithei - Red Cross

Democratic Republic of Congo-a Ebola hri leng mek chuan a vawrtawp a la thleng lo a, hri leng hian a la awh rei maithei tih Red Cross chuan a sawi. Hri darh zel tur dang tur hian kum khat vel a ngaih maitheih tur thu an sawi.

May 15a DR Congo-a Ebola hri a leng tih puan a nih hnuah he hri vang hian mi192 an thi tawh tih World Health Organisation chuan a sawi. Hri len nasatna, Bunia province khawpui Ituri ah chuan hri leng vanga buaina hi a la ziawm lo hle tih International Federation of Red Cross and Red Crescent Societies (IFRC) official Bruno Michon chuan a sawi a ni.

Michon chuan hri kai rinhlelhte test-na tur hmun a awm tam tawk loh avangin he hri darh dan hi eng ang chiah nge tih hriatfiah a har tih a sawi. Hri leng hi a peak a la thleng lo nia an ngaih thu a sawi bawk.

DR Congo rama leng mek hi Ebola Bundibugyo strain a ni a, vaccine a la awm loh bakah a enkawlna tur damdawi pawm pawh a la awm lo. Hei vang hian hri kaite enkawl dan pawh a la buaithlak hle. Congo ṭhenawm, Uganda ramah hri kai hi mi 19 hmuh chhuah ni tawhin, an zinga pahnihin an thihpui tawh a ni.