Russia-ASEAN inzawmna nghet zawk siam remti

Russia rama Russia-ASEAN summit neihah Russia president Vladimir Putin leh Association of Southeast Asian Nations (ASEAN) ram hruaitute chuan Russia leh ASEAN in economic leh political lamah inzawmna nghet zawk siam an remti.

Kazan khawpuia summit neihah hian khawvel huap leh bial huam chhunga thil pawimawhte an ngaihtuah bakah, Russia-ASEAN inzawmna neih dante thlirin, hma lam huna an thawh ho zel dan turte an ngaihtuah a, declaration an ziak nghal bawk.

Summit thlengtu, Russia president Putin chuan security lam bakah trade leh investment, energy, agriculture, digitalisation, sciene leh technology, tourism leh humanitarian contact lamah thawh dunna zau zawk an siam dawn tih a sawi.Kazan summit chu Russia-ASEAN inlaichinna atana hma an laknaa hriatreng tur a nih thu leh, thawh hona nghet leh pawimawh zawk neih zel an tum tih summit-a telte chuan an sawi.

Putin chuan summit kar lakah ASEAN ram hruaitute chu a hranin meeting a neihpui hlawm bawk. ASEAN-ah hian Brunei, Cambodia, Indonesia, Laos, Malaysia, Myanmar, the Philippines, Singapore, Thailand, East Timor leh Vietnam an tel. An zinga ṭhenkhat chuan US lam an thlawp laiin, China leh Russia nena inzawmna ṭha tak siam an awm bawk. Ukraine-Russia war avanga khawthlang ramten Russia oil lakah hrekna an siam chungin, ASEAN member ṭhenkhat - Philippines, Indonesia, Thailand leh Vietnam te chuan Russia oil hi an lei sak chhunzawm tho a ni.