Australia ramah H5N1 bird flu vei hmuh a ni

Australia ramah bird flu, H5N1 strain vei chu pem lut chi sava chi khat, brown sakua ah hmuh a nih thu Agriculture Ministry chuan Inrinni khan a sawi. Inkaichhawn awl tak, H5N1 strain hi khawvela khawmualpui tinah hmuh a ni ta a ni.

Agriculture minister Julie Collines chuan he hri hi an ram khawthlang lam, Esperance khaw bula Cape Le Grand National Park-a sava pakhatah hmuh a nih thu a sawi. Esperance-ah vek hian hri vei nia rinhlelh sava pakhat a awm bawk tih a sawi. Australia ram hi hun eng emaw chen H5N1 bird flu awm lohna khawmualpui awmchhun a ni ṭhin a, "Bird flu awm lohna kan ni reng thei ta bik lo a ni," tiin Collin chuan a sawi. He natna hi ar leh sava zingah a darh chak avangin hma lak thuai a ṭul tih a sawi bawk.

Bird flu hi ar leh sava bakah ramsa dang - sihal, seal leh otter te pawhin an kai thei a ni. Bird flu zinga khawvela sava zinga darh nasa ber chu H5N1 strain hi a ni a, kum 1990 kum tawp lama China ram aṭanga lo chhuak ṭan a ni. Sava pem kual chi ten he hri hi an pu darh ṭhin nia hriat a ni. Mihring pawhin a kai theih nia sawi ni mah se kai chu an awm khat hle thung a, a tlangpuiin ran damlo an khawih fuh aṭangin an kai ṭhin a ni.