Britain PM a nihna aṭangin Keir Starmer a bang

Britain prime minister Keir Starmer chu nimin khan prime minister leh rorellai, Labour party hruaitu a nihna aṭangin a bang.

Starmer chuan 10 Downing Street pawnah chanchinthar lakhawmtute hmuin a ban thu hi a puang a ni. Labour party hruaitu thar thlan a nih hma chu caretaker prime minister angin a la awm zui tur thu a sawi bawk.

Kum 2014 inthlanah Labour party-in hnehna an chan hnuah Starmer hian prime minister hna hi a chelh a; mahse, a policy chungchangah a minister leh party MP zingah duh lotu an pung a, hruaitu nihna dinhmun pawh mi dang kuta pe tura nawrna tun hnaiah a nasa chho hle. Kar liam taa Makerfield by-election ah Greater Manchester mayor hlui, Andy Burnham a chak hnuah Starmer hi bang tura nawrna a nasa zual a, Burnham hian Labour party hruaitu dinhmun hi chuh a tum tih pawh a lo sawi tawh a ni.

Starmer chuan Britain prime minister dinhmun a chelh chu a nuna thil thlenga chhuanawm ber a ni tih a sawi a; mahse, an party lamin inthlanpui nei leh turah ram leh party hotu hna chelh turin a ṭha ber tawh lo nia an ngaihna chu a pawm tih a sawi bawk. An ram lal hnenah pawh a ban tum chungchang chu a hrilh tawh thu sawiin, amah thlaktu tur hnenah pawh boruak ṭha tak hnuaiah thuneihna hlan chhawngin, a theih angin a thlawp zel dawn tih a sawi. Labour National Executive Committee hnenah amah thlaktu tur thlanna chu buaipui ṭan nghal turin a ngen bawk.

Rorellai Labour party hruaitu thar atan Andy Burnham chu rinkai ber a ni a, ani bakah health secretary hlui Wes Streeting, deputy prime minister Angela Rayner leh energey secretary Ed Miliband te chuan chuh an tum nia sawi a ni bawk. Party hruaitu ni turin candidate hian vote tla aṭanga 50% a hmuh a ngai dawn a ni. Vote thlak thei chin hi registered member, kumin January 20 hmaa inziak lutte an ni.