Shutdown vanga hlawh la thei lote an insiamrem a ngai dawn : Trump

US President Donald Trump chuan sorkar hnathawk, sorkar khar vanga hlawh la thei lo te chu an insiamrem a ngai dawn tih sawiin, an harsatna tawhte a hriatthiampui thu a sawi bawk. 

Donalh Trump-a'n Mexico nen an inrina bang hungna tur bill a dil pawmsak a nih loh avanga sorkar a khar avang hian sorkar department eng emaw zat chuan hlawh an la thei lo a ni.

Hemi chungchangah hian Pathianni khan White House staff, Republican-te leh Democrats-te chuan inbiakna an nei leh a, Trump chuan Nilaini thlengin inbiakna an la nei dawn tih sawiin hlawh la thei lo te chu an insiamrem mai hrih a ngai dawn niin a sawi.

Trump hian Pathianni khan thil awm zel dan a zirin national emergency pawh puan a la ni maithei niin a lo sawi tawh bawk a, a hmalakna chu mi tam takin an hriatthiam thu a sawi bawk.

Federal worker 800,000 velin hlawh an la thei lo mek nia tarlan niin, hnathawk 420,000 vel chuan hlawh la loin hna an chhunzawm mek laiin mi 380,000 vel chu hna thawhtir hrih loh anni thung.