Syria aṭanga US sipai lakchhuahah chhan ṭha tak a awm: Bolton
US National Security Adviser John Bolton chuan US-in Syria aṭanga a sipaite a lakchhuah chu chhan leh vang ṭha tak neia tih a ih thu a sawi.
Israel leh Turkey tlawha zinnaah Bolton chuan Northern Syria-a Kurds-te himna turin Turkish-te intiamna a duh thu a sawi bawk. US chuan Islamic State (IS) pawl tlem la awmte chu hneh an nih ngei tih chian an duh thu a sawi bawk a ni.
US sipaite lakchhuah an nih dawn avang hian President Donald Trump chu nasa taka sawisel a lo ni tawh a nih kha.
Trump hian December 19 khan an sipaite lakchhuah an nih dawn thu a sawi khan ni 30 chhungin Syria hi an chhuahsan dawn niin US official-te chuan an puang ve nghal a ni.
Mahse Trump hian tun hnaiah khan IS zawng zawngte hi hneh an nih hma chuan an sipaite zawng zawng hi an la lachhuak dawn lo tih a sawi.
Bolton chuan an sipaite lachhuak tur hian hun biktuk an nei lo tih sawiin, IS-te hneh an nih vek hnuah chuan an sipaite chu an lachhuak vek dawn niin a sawi.
Tunah hian Syria-ah hian official report aṭang chuan US sipai 2,000 vel an la awm nia tarlan a ni a, mahse a tak takah chuan hei aia tam hi an la awm rin a ni thung.