Hamas din cham lawmin Gaza-ah kawngzawh

Islamic group, Hamas din champha vawi 29-na lawmin Nilaini khan Gaza Strip-ah Palestinian mi tam takin kawng an zawh.

Kawngzawhte hian aurinna hmangin Hamas au hla-te an tichhuak a, kawngzawh zinga tam tak chuan an hmai an tuam a, naupang te chuan rifle lem an keng bawk.

Hamas official, Khalil al-Hayya chuan thu sawiin, Palestinian President Mahmoud Abbas-a kaihhruai Fatah party nena inzawmkhawm dan ngaihtuah a ngaih thu a sawi a, hemi rual hian inzawm≠khawm tur chuan Hamas-te duh dan ang a ni tur a ni, a ti. President Abbas-a chu Palestinian mipui zawng zawng aiawhtua an pawm loh thu a sawi bawk.

Hamas hian kum 2007 khan Fattah nen nasa tak an inbeih hnuah Gaza hi an awp a, hemi hnu hian Palestinian-te hi pawl hnihah inṭhenin, Gaza Strip hi Hamas hnuaiah a awm a, Abbas-a kaihhruai Fatah chuan West Bank-ah ro an rel thung. Pawl hnihten hian inzawmkhawm tumin vawi tam tak inbiakna nei tawh mah se, tun thlengin inremna an la siam thei lo.

Hamas-aín Gaza Strip an awp hnuah Israel leh Egypt chuan Gaza kalpawhna kawngte an dang nghal a ni. Gaza-ah hian Hamas leh Israel hi ṭum thum an indo tawh a, kum 2014 khan ni 50 chhung indoin, Palestinian mi 2,000 chuang an thi a, thi zinga a tam zawk hi civil mi an ni.

Gaza pawhtu kawngte dansak a nih chungchangah Israel hian sawisel a tawk fo a, mahse Hamas-teín ralthuam an lakluh tur venna atana thil tih ngei ngai niin a sawi thung.

Hamas hotu lu ber, Khaled Meshaal hi Qatar khawpui Doha-ah a cheng a, a deputy Ismail Haniyeh erawh chu Gaza Strip-ah hian a cheng thung a ni. Kum 2006-a Palestinian legislative election-ah khan Hamas hi an chak a, mahse he inthlan result hi Israel leh US chuan an pawmsak lo.