Inremna siam pawm duh lo FARC hruaitu panga hnawtchhuak

Colombia helpawl, FARC chuan sorkar nena inremna thuthlung an ziah pawm lotu, an pawl hruaitu panga te chu a hnawtchhuak.

FARC chuan remna leh muanna a awm theihna tura an hmalakna chu zawm vek turin an member-te an ngen a, a kawhmawh bawl zawnga awm lo turin an ti.

Colombia sorkar leh FARC-teín inremna an siam hnuaiah hian helpawl hian an ralthuamte dahthlain, an pawl hi political party-ah an let dawn a ni. Hetih lai hian FARC member eng emaw zat chuan an pawl thuneihna bial huam chhungah chuan, ruihhlo tawlh a, nuamsa taka an khawsak ang khan la awm zui zel an duh a ni. FARC hian cocaine leh ruihhlo dang an tawlhruk hmanga sum an hmuhte chu an pawl inenkawlna atan an hmang ṭhin.

FARC hi kum 1964 aṭang khan sorkar lakah helin, Colombia rama helpawl hlun ber an ni. Kum 50 chuang hel leh sorkar sipaite inbeihna avang hian mi 220,000 an thi hman a ni. July thla khan Colombia sorkar leh FARC hian inremna an ziak a, mahse ram mipuiten ngaihdan lakah an inremna siam dan hi an pawmpui loh avangin an inbe ṭha leh a, October thla khan eptu lam rawtna siam hrang hrangte ngaihtuah telin, inremna hi an ziak ṭha leh a ni.