SKorea-ah thla 22 chhung nau piang an pung

South Korea ramah a zawnin thla 22 chhung chu nau piang zat an pung tawh tih nimina statistical ministry data tihchhuah chuan a tarlang.

Ministry-in ‘April Population Trends’ a tihchhuahah, kumin April thla chhunga nau piang zat chu 24,521 niin, nikum hemi hun chhunga nau piang zat aiin 18% in an tam. Kum 1981-a data mumal taka siam a nih hnuah April thla chhunga nau piang an pun tam ber ṭum a ni. Kum 2024 July thla aṭang khan nau piang zat hi a pung chho tawh a ni.

South Korea-ah hian nau piang an tlem zel avangin an ram mipui zat pawh a tlahniam zel a, hei vang hian sorkar lam pawhin nau piang an pun theihna turin ṭan a la chho a ni. April thlaa fertility rate chu 0.93 ah a chho a, nikum aiin 0.13 in pung mah se, ram mipui an ral lohna tura fertility rate ngai zat, 2.1 erawh a la pha lo hle.

Data agency chuan thla hnih liam ta chhungin innei an pung a, a bikin hmeichhia kum 30 tling tawh zingah pasal nei an tam chho tih sawiin, hei vang hian nau piang pawh an pung niin a sawi. April thlaa innei zat inziak lut chu 20,622 niin nikum hemi hun lai aiin 9% in an pung. March thla khan innei inziak lut hi 20,000 chuang a tling bawk. Mahse, April thlaa inziak lut hi kum 2016 hnua thla khat chhunga innei inziak lut tam ber thla a ni.