Trump-an Israel ambasador atan David Friedman thlang

US President-elect Donald Trump chuan Israel-in Palestinian rama Juda-te chenna tur a sak mek thlawptu ruh tak, David Friedman chu Israel-a US ambassador atan a thlang.

David Friedman hian ram palai hna thawhna lamah tawnhriat a la nei lo. West Bank leh East Jerusalem-a Juda-te chenna tur in Israel sorkarin a sak mek thlawptu ruh tak a ni chu hriat a hlawhna ber pakhat a ni. He in sak hi international law palzutna a ni tiin, Israel chuan sawisel a tawh phah nasa hle thung.

Israel-in Palestinian ram a luahsaka in a sakah hian Juda mi 530,000 vel an khawsa mek niin Israel rights group, BíTselem chuan a tarlang.

Friedman chuan Israel khawpui pawimawh tak, Jerusalem aṭang ngeia US palai hna thawh a chak thu a sawi. US embassy hi Israel ram khawpui, Tel Aviv-ah a awm mek a, mahse Friedman hian Jerusalem lamah sawn a nih theih nan hma a lak rin a ni. President hlui Bill Clinton leh George W Bush-te pawh khan US embassy hi Jerusalem-a sawn an lo tiam ve ve tawh a, mahse an ti hlawhtling lo a ni.

Palestinian Authority chuan Palestinian state a din hnuah East Jerusalem hi khawpui atana hman a tum a, Europe leh Arab ram tam zawk chuan Israel-in East Jerusalem neitu nia a inchhalna hi an pawmpui lo a ni.

Trump chuan Israel leh US-in inzawmna ṭha bik tak an neih chu Friedman chuan a vawng nung zel dawn tih a sawi a, buaina awmte chu rang taka chingfel zung zung mi a ni, a ti.

Ram hrang hrangten sawisel mah se, Israel Prime Minister Benjamin Netanyahu chuan Juda-te chenna in sak belh zel a tiam. Kum 2015, March thlaa PM atana thlan nawn a nih hma ni khan Netanyahu chuan Palestinian state din tuma hmalakna chu dan zel a tum thu a lo sawi tawh bawk. Kum 2009 - 2014 inkar khan Juda-te chenna in sak hi 23% in Israel sorkar chuan a tipung a ni.