SKorea President office dap dawn

Thuneihna dik lo taka hmanga puha eptuten bang tura an nawr mek, South Korea President Park Geun-hye-i office chu dap a ni dawn tih prosecutor-ten an sawi.

President Park-i hi a ṭhian ṭha, sorkara nihna pawimawh engmah nei lo, Choi Soon-Sil duhsakna uchuak taka lantira puh a ni a, local firm-te chu Choi-a foundation tan dollar tam tham tak a thawhtir a ni. Hei bakah hian sorkar policy siam kawngah pawh Choi-i hi a inrawlh tir nia sawi a ni bawk.

Kumin October thla khan sorkar hnuaia prosecutor-te chuan Park-i office hi dap an tum tawh a, mahse heng mite hi gate-ah lo hnar an nih avangin Parliament member-te chuan investigating team dang an din leh a, anni hian President hi an chhui zui a ni.

Park-i chuan sipai kaihhnawih thil pawimawh tawp a nih loh chuan Blue House chu dap theih a ni lo tih a sawi a, mahse official-te chuan dan hmanga dap a nih theih dan an ngaihtuah dawn tih an sawi.