Aleppo aṭangin civil mi tam tak chhuak

Syria sorkar leh helhoten Aleppo khuaah inkahhai an puan tak avangin he khua civil leh hel tam tak an chhuak. Sorkar chuan civil mi te bakah, hel chhuak duhte tan kawng a hawng a ni.

Aleppo khuaah hian hun rei tak sipai leh helho an inbeih hnuin, sorkar chuan helho kut aṭangin thuneihna a laksak dawn hnai tawh a ni.

International Committee of the Red Cross chuan khawpui chhuahsan duhte tana hun hawn a nih hnu hian convoy pathum hmangin civil mi hliam tuar bakah hel leh an chhungte chu thiar chhuah an ni a, civil mite chu bus leh ambulance hmangin hruai chhuah an ni bawk.

Red Cross hotu Marriane Gasser chuan civil mi 3,000 bakah hliam tuar tam tak hruai chhuah an ni tawh tih a sawi a, ni eng zat nge mipuite thiar chhuah nan hian ngai dawn tih hriat theih a la ni lo tih a sawi. UN palai Staffan de Mistura chuan khawpui chhungah hian mi 50,000 vel an la awm a, an zinga mi 40,000 chu civil mi an nih thu a sawi.

Kum 2011 aṭang khan sorkar laka helte leh Syria sipaite hi an inbei ṭan a, inbeihna thleng vang hian mi 310,000 chuang an thi tawh a, Aleppo khawpuia cheng zinga a zahve aia tam chu an tlanchhe tawh bawk.