Israel Parliament-in incheina dan a siam a hlip

Israle Parliament, Knesset chuan staff-te inchei dan, dress code a siam chu staff-ten duh loa lungawi lohna an lantir avangin a hlip leh lailawk.

Knesset hian an staff hmeichhiate chu pawnfen chhing fen a khap a, hei bakah hian an ṭhiante chu Knesset building-ah an luh a khapsak bawk.

Speaker Yuli Edelstein chuan mawi lo taka inchei an awm fo avanga complaint an dawn hnuin he ruahmanna hi siam anih thu a sawi a, joint team chuan dan siamte hi enfiahin, eng anga kalpui tur nge an la rel dawn a ni, a ti. Joint team-ah hian Parliament member hmeichhia leh mipate an tel ang.

October thla khan Parliament administrative director chuan staff zawng zawng hnenah inthuam dan tur chungchanga hriattirna hi a lo pe tawh a ni. Dan siamah hian T-shirt, kekawr bul, sandals, kawrfual chhing leh pawnfen chhing te khap a ni.

Staff hmeichhiate chuan inchei dan tura khuahkhirhna siam hi duh loin, pawnfen chhing fengin lungawi lohna an lantir a ni.

Speaker Edelstein chuan Knesset-a thawkte tana dress code siam hi tun hnaia siam a ni lo a, kum eng emaw zat liamtaah siam a ni tawh a, a taka kalpui a la ni lo mai niin a sawi.