Khawvel Lawrkhawm

Obama’n Russia chunga action lak a tiam

US President Barack Obama chuan US President thlan dawna campaign-naah Russia a inrawlha puh a nih hnuah, Russia chungah action lak a nih ngei tur thu a sawi.

Russia hi election campaign neih laiin Democartic Party email leh, Hillary Clinton-i thawhpui hnai tak email-te khawihah puh a ni a, mahse he puhna hi Russia chuan a pha nasa hle thung. Repubican president-elect Donald Trump pawhin Russia puh a nihna hi thil awihawm lo tak a nih thu leh, he thilah hian politics a inrawlh niin a sawi. White House thupuangtu chuan Russia President Vladimir Putin chu thil dik lo tihnaah hian a inrawlh ngei niin a sawi bawk.

Biak-in beitu thiam loh chantir

US-a Charleston biak-in bei a, African American pakua kap hlumtu, Dylann Roof chu thiam loh chantir a ni.

Mi ngote dah chungnun duhtu, Dylann Roof hian kum 2015, July 17 khan Emanuel African Methodist Episcopal biak in hi beiin, Bible study group-te chu a pawng kah a ni. A thiltih chhan hi mi hangten mi ngote chunga pawi an khawih fo avanga a chhan letna niin a sawi. A mi kah zinga pakua an thi a, pathum an damchhuak. Biak-in a beih aṭanga darkar hnih hnuah man a ni a, thubuai 33 siam sakin heng thubuaiahte hian thiam loh chantir vek a ni. Kum 22 mi, Roof-a hremna tur hi puan a la ni lo a, thi tura hremna pek a ni mai thei nia sawi a ni. Thiam loh chantir a nih thu chhiar chhuah a nih lai pawhin Roof-a hian inchhir leh hrehawm ti hmel a pu lo niin an sawi.