Venezuela-ah lirnghing vangin mi 32 an thi

Venezuela ramah an ram huna Nilaini zan tir lamah magnitude 7.2 leh 7.5 a nain lir a nghing a, chhiatna a thlenah mi 32 an thi a, hliam 700 chuang an awm bawk. Lirnghing vang hian in tam tak a chhe bawk a ni.

US Geological Survey in a tarlan danin, lirnghing hmasa zawk hi zan dar 6:04 ah an ram khawpui, Caracas aṭanga khawthlang lam, km 284 vela hla San Felipe bulah magnitude 7.2 a nain a nghing a, minute khat chhungin km 45-a hla, Yumare bulah magnitude 7.5 a nain a nghing zui leh nghal a ni. Hemi hnu hian lirnghing nawn, afterschock vawi 20 vel a thleng leh bawk. Caracas leh a chhehvelah pawh chhiatna a thlen nasa hle.

Interim president Delcy Rordiguez chuan state of emergency a puang nghal a, nimin zing khan thuchah tichhuakin, lirnghing vanga thi zat report an dawn chu 32 niin, hliam 700 chuang an awm tih a sawi. Hemi rual hian lirnghing tuar nasa ber, La Guaira biala chhiatna a thlen dan report kimchang an la dawng lo a, thi zat pawh hi an la pun chhoh a rinawm thu a sawi. USGS chuan an chhut danin lirnghingin chhiatna a thlen avanga thi hi mi sang tel an tlin a rinawm thu a tarlang.

Lirnghing tuarte chhan chhuah leh ṭanpui hna hi ngawrh taka thawh nghal a ni a, Rodriguez chuan in chim hnuaia tangte him taka chhan chhuah chu an ngaih pawimawh ber a nih thu a sawi. Ram dang hruaitu eng emaw zat chuan puih an tum thu pawh an sawi tawh a, an zingah US president Donald Trump pawh a tel a ni. President Trump chuan Truth Social-ah Venezuela ramah lirnghing na tak vawi hnih thlengin vangin mi tam takin an thih phah a, anni pui turin USA chu a inpeih reng tih sawiin, agency hrang hrangte pawh rang taka che chhuak tura a hriattir thu a sawi. Secretary of state Marco Rubio chuan rescue team bakah damdawi lam mamawhte pawh thawn nghal an ni thu a sawi a ni. Dominican Republic, Mexico leh El Salvador pawhin rescue team an tir dawn tih an sawi tawh bawk.