France-ah Ebola kai hmu chhuak

Democratic Republic of Congo leh a ṭhenawm ram ṭhenkhata hri leng mek, Ebola hri kai chu Africa khawmualpui pawn lamah hmuh chhuah an awm ta. France ramah Nilaini khan doctor pakhat, DR Congo rama zin haw chu Ebola a kai tih hmuh chhuah a ni.

France ramah hian Ebola hri kai an hmuhna hmasa ber a ni. Thawhlehni khan Kinshaha aṭangin commercial flight hmangin Paris a thleng a, lu na tih loh chu symptom dang pawh a nei hran lo niin health ministry chuan a tarlang. Thlawhtheihnaa a chuan laiin a lu na a zual avangin Paris a thlen velah dah hran nghal a ni a, test neih a nih hnuah Ebola hri a kai tih an hre ta a ni. A dinhmun erawh a ngaihtuahawm lo niin ministry chuan a tarlang.

Ebola hri kai an hmuh chhuah chuanna, Air France fligth-a chuangte list chu thuneitute pek nghal an ni a, health authority lamin bepawpin an buaipui mek. Health minister Stephanie Rist chuan an zinga panga chu hri kai nen contact an neih avangin venthawn thilah dah hran nghal an ni tih a sawi.

Prime minister Sebastien Lecornu chuan thil awmdan chu uluk taka an thlithlai nghal thu a sawi a; mahse, mi dang inkaichhawn theihna erawh a hniam hle tih an tarlang. World Health Organisation (WHO) hotu, Tedros Adhanom Ghebreyesus pawhin Ebola hi khawvel huapa a darh theihna a hniam hle tih a lo sawi tawh bawk.