Venezuela-a lirnghing vanga thi mi 1,430 an tling; Japan-ah magnitude 6.2-a nain lir a nghing

Venezuela rama June 24 zana magnitude 7.2 leh 7.5-a naa lirnghing vanga thi chu Inrinni thleng khan mi 1,430 an tling tawh a, lirnghing tuarte chhan chhuah hna hi ngawrh taka thawh chhunzawm zel a ni.

UN humanitarian agency OCHA chuan lirnghing tuarte zawn leh chhan chhuah hna thawhnaa pui turin ram 17 aṭangin rescue team tirh luh an ni tawh tih a sawi. Lirnghing thlen dan an zir chianna aṭangin mi mtd 6.76 vel a nghawng a, heng mite ṭanpuina tur emergency shelter, tui thianghlim, hygience service, healthcare leh relief item-te mamawh a ni dawn tih a tarlang. UN aid chief Tom Fletcher chuan thi zat hi an la pun chhoh a rinawm thu sawiin, chin hriat loha awm hi mi 50,000 chuang an tling niin a sawi bawk.

UN chuan Venezuela rama lirnghing rapthlak tak thlengin chhiatna a thlena thil chhe zat hi USD tld 6.7 hu vel niin a chhut a, hei hi an ram GDP aṭanga 6% a tling pha a ni.

UNICEF chuan lirnghing rapthlak tak thleng vangin Venezuela ramah mi mtd 1.8 vel chu chhawmdawl ngaiin an awm mek a, an zingah hian naupang 680,000 an tel tih a sawi. La Guaira, Caracas, Carabobo, Aragua leh Falcón state-a hospital hrang hrangte chu lirnghing hian a tichhe tel a, hei hian health service lam pawh a nghawng buai hle tih an tarlang. Hei bakah school pawh eng emaw zat a chhe tel a, naupang zirna lam pawh a bahhlah phah bawk.

Japan-ah magnitude 6.2-a nain lir a nghing

Japan ram hmar chhak lamah nimin zing khan magnitude 6.2-a nain lir a nghing a, tihl tihchhiat lian tham erawh report a awm lo. Tsunami warning pawh tihchhuah a ni lo bawk.

Lir nghinna hi Iwate Prefecture-ah niin, an ram huna zing dat 7:25 ah a nghing a, Aomori Prefecture leh a bul hnai region dangah pawh an hria a ni. Kar liam ta Zirtawpni khan Yamanashi Prefecture leh a chhehvel, Mount Fuji bul hnaiah magnitude 5.6-a nain a lo nghing tawh bawk a ni.