Bangladesh PM hlui Hasina-in kuminah an rama kir a tum

Bangladesh prime minister hlui, kum 2024 August thla aṭanga India rama tlanchhe mek, Sheikh Hasina chuan kumina an ramah kir leh ngei a tum tih Pathiannia interview a neihah a sawi.

Kum 2024-a zirlaite kaihhruaia a kaihhruai sorkar policy duh lohna lantira nawrh huaihawt a nih hnuah, kum 78 mi Hasina kaihruai sorkar chu paihthlak a ni. Hemi hnu hian India ramah a tlanchhia a, tun thlengin a la awm a ni. India rama a tlanchhiat hnuah thubuai hrang hrang siamsak a ni a, a mihring puite laka pawikhawihna nasa tak thlena puh a nihnaa thi tura hremna pawh pek a lo ni tawh bawk.

Hasina hian an ram a chhuahsan hnuah vantlang hmuhah a inlan khat hle a, kumin January thla khan New Delhi-ah press club-ah thu a sawi a, hemi hnua a inlan leh hmasak ber chu Pathiannia NDTV-in an kawmna an tihchhuah kha a ni. Hasina chuan an ram court-in hremna a pek chu a hlau lo tih a sawi a, he hremna pek a nih dan hi dan lo leh ram danpui kalh, politics inbeihna vang chauh niin a sawi. Hei vang hian an ramah kir a, democracy tundin a nih leh theihna aana beih a tum tih a sawi. "Ka laka phiarrukna hrang hrang an hmang a a ni. Mahse, heng min beihna leh phiarruknate hi ka paltlang dawn a, kan ramah kumin chhung ngeiin ka kir leh dawn a ni," a ti. Paihthlak an nih hnuah a party, Awami League party chuan Bangladesh sorkar tharin dan pawnah hnawl mah se, thuneihna an chan leh ngei a ring tlat tih a sawi bawk. An party chu kum 77 a ni awh a, beihna leh hrek pawh an lo tawk fo tawh a, mahse thlawptu ṭha tak tak neiin an tho chhuak leh ṭhin tih a sawi.