Myanmar President-in Lao tlawh dawn

Myanmar president Min Aung Hlaing chu Lao ramah a zin dawn a, hei hi sipai hotu a nihna aṭanga president-a dah a nih hnua Association of Southeast Asian Nations (ASEAN) member ram a tlawhna hmasa ber a ni ang. Hemi hma hian India leh China a lo tlawh tawh bawk.

Lao president Thongloun Silsoulith sawmna angin Min Aung Hlaing hi a zin dawn a, a nupui bakah cabinet minister leh official eng emaw zatin an ṭawiawm ang. A zin hun tur tak hi puanzar a la ni lo.

ASEAN member ram 11-te chuan nikum December leh kumin January thlaa Myanmar ram inthlanpui neih result chu an pawmpui thu an la sawi lo. He inthlanah hian eptu pawl liante chu inthlan chuh thei loa siam an ni a, sipai thlawp party chu hneh taka thlan tlin a ni. Inthlan result an thlawp thu sawi lo mah se, Myanmar-a civil sorkar din a nih hnuah ASEAN hruaitute chuan Myanmar hi thawhpui dan tur pawh an ngaihtuah chho a, Malaysia foreign minister Mohamad Hasan leh Thailand palai Sihasak Phuangketkeow te pawhin an lo tlawh tawh bawk. Min Aung Hliang pawhin inthlan zawh hnuah ASEAN nena inzawmna ṭha siam leh chu a kaihhruai sorkarin a ngaih pawimawh ber tur zinga mi a nih thu a sawi bawk a ni.