President Trump-an national emergency puanah a vau

US President Donald Trump chuan Congress in Mexico ramri hungna bang siamna tura a sum phut, dollar tluklehdingawn 5.6 chu a pek duh loh chhunzawm zel a nih chuan sorkar department ṭhenkhat chu hna thawk chhunzawm thei loa a thla tel emaw, kum tel emaw dah chhunzawm leh, an rama national emergency puanah a vau. 

Kar kalta Zirtawpni khan President Trump hian Democrats hotute chu meeting neihpuiin, sorkar shutdown tihtawp a nih theih dan turte an sawiho a, mahse inremna an siam thei lo. 

President Trump chuan Congress pawmpuina lak kher ngai loa ramri hungna bang siam anih theihna atan hian national emergency a puang maithei niin a sawi. 

Senate Minority Leader Chuck Schumer chuan preident hnenah hian shutdown tihtawp thuai a ngaih thu an hrilh tih a sawi a, mahse president hian a duh anga thil kalpui a nih theihna turin a ring a tikhawng tlat a, sorkar chu hun rei tak chhung a khar chhunzawm maitheih thu a hrilh niin a sawi. An la sawiho chhunzawm zel tur thu a sawi a,mahse sorkar chu hnathawk theia siam anih phawt loh chuan hmasawnna hmuh a  har dawn a ni, a ti. 

Meeting-naa tel House Speaker Nancy Pelosi pawhin sorkar shutdown chu tihtawp thuai a ngai tih a sawi a, he an buaina hi chinfel thuai a nih loh chuan America mipui leh border security pawhin a tuar dawn a ni, a ti. 

Trump chuan dan loa an rama mi tam tak lut ṭhinte, ramri kaltlanga mihring hmanga sumdawng leh ruihhlo tawlhru ṭhinte venna turin ramri hungna bang ṭha tak siam a duh mai chauh niin a sawi a, hemi atana a senso tur dollar tld 5.6 chu pe turin an ngen tih a sawi. He thil hi an ram himna kaihhnawih thil a ni a, a hmaa president lo ni tawhte pawhin an lo tih tawh tur zawk a ni tih sawiin, ṭhenkhat pawhin ti ngei turin an hrilh niin a sawi. Democrats-te pawhin ruihhlo tawlhruk leh dan loa lutte lo dan chu an duh tih a sawi bawk.