DR Congo : President thlan result puan hun tikhawtlai

Democratic Republic of Congo (DR Congo) president thlanna, kar kaltaa neih tak result chu nimin khan tihchhuah tura tih ni mah se, official-ten result tihchhuah hun hi an tikhawtlai. Result puan hun tur hi sawichian a la ni lo.

Electoral Commission hotu Corneille Nangaa chuan vote thlakna ballot chu a zahve pawh a la thlen khawm loh avangin result tihchhuah hun hi tihkhawtlai a ni tih a sawi. 

Hetihlai hian inthlan neihpui tura observer sang tel tirtu, Catholic Church chuan inthlan neih takah hian chiang taka hnehna changtu a awm ngei a, boruak 

ṭha lo zawk a thlen lohna turin result chu puang chhuak thuai turin a phut tih a sawi. 

Congo president thar tur thlannaah hian candidate 21 an awm a, an zinga a langsar zual chu eptu pawl candidate Martin Fayulu leh Felix Tshisekedi bakah interior minister hlui Emmanuel Ramazani Shadary-te an ni.

Emmanul Ramazani Shadary hi kum 2017-a eptu pawl nawrh huaihawtte beih let an nih chungchangah inhnamhnawiha puhin European Union in a hrek mek a ni. Martin Fayulu hi oil executive hlui a ni a, Felix Tshisekedihi veteren opposition leader fapa a ni.  

President ṭanglai Joseph Kabila chuan kum 2001-a a pa thah a nih hnuah Congo president atan dah a ni a, kum 2006 leh 2011 inthlanah khan thlan tlin leh a ni. An ram danpui hnuaiah president dinhmun hi a chuh chhunzawm thei lo. Kum hnih kalta khan inthlan hi buatsaih tur a ni a, mahse election commission chuan voter ziahluhna atan hun tam zawk an mamawh nia a sawi avangin inthlan hun pawh sawn hlat a nih phah a ni.