President Vucic laka lungawi lohna lantir

Kar kalta Inrinni khan Serbia ram khawpui Belgrate leh an ram chhung khawpui dangahte mi tam takin President Aleksandar Vucic lakah lungawi lohna an lantir a, hei hi nawrh an huaihuat kar nga-na a ni. 

Mipui pungkhawmte chuan president hian an ram media-te a thunun tlat niin an sawi a, eptuten beih an tawk fo tih an sawi bawk. 

Nikum November thlaa mi tu tih hriat lohten eptu politician Borki Stafanovic an beih aṭang khan lungawi lohna hi a rawn irh chhuak ṭan a ni. Eptu pawl intelkhawm, Alliance for Serbia chuan Stefanovic beitute hi President Vucic ṭantute niin an chhal a, mahse hei hi thuneitute lam chuan thu dik lo niin an sawi thung. 

President Vucic-a kaihhruai rorellai Serbian Progressive Party (SNS) hian Paliament-a seat 250 awmah seat 160 a nei mek a ni. Kum 2017-a president thlanna neihah khan Vucic hian vote tla aṭangin 55%-a hmu pha a ni. President chuan nawrh huaihawtte chu inremna kawng zawnga inbiakna neihpui a duh thu a lo sawi tawh a, hemi rual hian eptu pawl dawt sawi chingho erawh biak a tum lo tih a sawi.