South Africa-a dan loa pem lut duh lohna lantir

South Africa-ah dan loa pem lutte duh lohna lantirin ram puma nawrh huaihawt a ni a, nawrh huaihawtte hian tharum thawhna thlenin dawrte an rawk a, mi pakhat kah hlum a ni bawk. Nawrh huaihawt zinga mi 900 chuang police-ten an man a ni.

Thawhlehnia nawrh huaihawt hi civil society group 20 chuang ṭanghoin an buatsaih a ni a, an zingah hian March and March movement pawh an tel. An rama document mumal nei lo lutte thawn kir tura hun tiam siam an phut.

Ram chhung hmun 120 velah nawrh hi huaihawt niin, heng zinga hmun 108-ah chuan boruak ṭha tak hnuaiah kalpui a ni tih Deputy National Police Commissioner Tebello Mosikili chuan a sawi a, hmun 12-ah buaina chhuakin police-te inrawlh a ngai a ni. Western Cape-ah buaina chhuak vanga man tam berin mi 215 man an ni a, Eastern Cape-ah mi 208 man an ni bawk.

President Cyril Ramaphosa chuan nawrh huaihawtte lungawi loh chhan chu a hrethiam tih sawiin, an rama dan loa pem lut, ramri enkawl dan leh public service chungchangte chu ngaihven ngai a ni tih a sawi. Hemi rual hian lungawi lohna lantir avanga dan pela chet chu a sawisel a, an ramah tharum thawhna chuan hmun a chang lo tih a sawi.

Hetih lai hian pem lutte bitum zawnga nawrh huaihawt chu human rights group hrang hrangin an sawisel thung. Ram chhunga khawtlang leh eizawnna lama hlawhchhamna, hna nei lo tam lutukna te, leh raltlan dilna buaipui loh tam tak awmte thup nan pem lutte hi puhmawh atana hman an ni zawk niin an tarlang.