Brazil-in Fortaleza khuaah sipai tir

Brazil sorkar chuan an ram hmarlama Ceara state khawpui, Fortaleza-a tharum thawhna thleng hluar zel dang turin spai 300 vel a tirh luh belh. 

Brazil hmarlam state-ah hian misual pawl hrang hrangten lungawi lohna lantirin dawr, bank leh bus-te an bei a ni. Hetianga pawi an khawihna chhan hi sorkar tan-in enkawlna dan khauh zawka siam thar an duh loh vang a ni. Jail tam tak hi criminal gang-te hian an thunun a ni.Tan in hotute chuan tan in chhunga mobile phone signal an titawp bawk. 

President thar Jair Bolsonaro chuan an rama pawikhawina thleng ṭhinte tihtlem a nih theihna tura theihtawpa beih a lo tiam tawh a, President chuan Fortaleza khuaa sipai tirh luh an nih chungchangah Justice Minister Sergio Moro thutlukna siam chu a fak bawk. Moro hian Brazil rama eirukna thlang langsar leh liantham tak chhuina, Operation Car Wash a lo ho tawh bawk a ni. 

Fortaleza khuaa tharum thawhna thlenga inhnamhnawiha puh mi 50 vel chu man an ni tawh a ni.

World Prison Brief-in a tarlan danin,Brazil ramah hian jail tang mek nuai sarih chuang zet an awm a, US leh China dawta mitang tamna ber ram a ni.