Iran-in Khamenei thlahna hun hmang ṭan Ni 6 chhung vuina hun hmang dawn

Iran chuan nimin aṭang khan an ram Supreme Leader hlui, Februarya 28-a US leh Israel te beihpuih thlaknaa thi, Ayatollah Ali Khamenei thlahna hun a hmang ṭan a, July 9-ah Mashhad khuaah vui liam a ni ang.

Kum 86 mi, Khamenei vui hun hi inbeihna thleng chhunzawm zel avangin tihkhawtlai a ni. Amah thlaktu, a fapa Mojtaba Khamenei chu a pa thlahna hun hman hrang hrangah hian security thil avangin a tel dawn lo nia sawi a ni.

Nimina a thlahna hun hmanah hian ram 30 chuang hruaitute an tel a, an ṭhenawm ram Iraq, Afghanistan leh Pakistan aṭangin mi tam tak an kal bawk.

Islamic Republic News Agency in a tarlan danin, Ayatollah Khamenei thlahna hun hi vawiin leh Pathianni hian Tehran-a Imam Khomeini Musallah ah neih a ni dawn a, kar leh Thawhlṭanni ah an ram khawpuiah a vuina hun hi hman a ni ang. Hemi hnuah Qom khawpuiah a ruang hi lain, Ninganiah Mashhad khawpuiah vui liam a ni dawn a, Imam Reza thlan bulah phum a ni ang.

Ayatollah Khamenei vuina hi modern Iran-a vuina inkhawma mipui an tel hnemna tur zinga mi a ni.. Kum 1989-a Supreme Leader hlui Ayatollah Ruhollah Khomeini vuina hun hmanah hian mi mtd 10 vel an tel a, Khamenei vuinaa tel zat hian hei hi a khum rin a ni.