Egypt-ah khawvela defence headquarters lian ber hawng

Egypt president Abdel Fattah al-Sisi chuan an rama administrative capital tharah State Strategic Command headquarters thar a hawng. He headquarters hi 'Octagon' tia sawi a ni a,a awmna hian acre 22,000 vel a awh a, a len lamah khawvela defence headquarters lian ber ni ṭhin Pentagon a khum a ni.

Mega complex-ah hian octagon-shaped building pariatin central mistrial building pahnih an hual a, building hrang hrangte chhuat zau zawng hi square feet mtd 50.5 a chuang a ni. Headquarters hi technology infrastructure tunlai ber ber hmanga thuam niin, armed forces command center a nih piah lamah, an ramin chona leh harsatna dang hrang hrang a hmachhawnna tura an lungpui pawimawh tak pakhat a ni dawn tih President chuan a sawi.

Inrinni liam taa headquarters a hawnnaah, president Sisi hi sipai thuam nen a inlan a, kum 10 chuang hnua mipui hmuha sipai thuam nena an inlan lehna hmasa ber a ni.

President hian remna leh muanna duh ramte chu Egypt chuan ṭha takin a thawhpui zel dawn tih a sawi a ni.

State Strategic Command headquarters awmna, administrative capital thar hi an ram khawpui, Cairo khawchhak lam km 40 vela hlaa awm a ni. Headquarters-ah hian military branch hrang hrang - army, navy, air force leh intelligence te an awm vek dawn a, hei hian an ram himna kaihhnawiha harsatna leh buaina tawh palhah pawh rang zawkin hma an lak theih phah dawn a ni.