UK PM thar tura beisei Andy Burnham

Britain prime minister Keir Starmer thlaktu tur, Labour party hruaitu thar thlan turah MP 80% ten Andy Burnham an thlawp a, a tlin ngei pawh rin a ni.

Labour party hruaitu thlanna tura nomination chu Ningani khan hawn a ni a, Burnham hi Parliament-a Labour member 403 zinga 322 in a thlawp. Party hruaitu dinhmun hi MP ni laiin an chuh a ngaih bakah, Labour MP zinga 20%, MP 81 in an thlawp a ngai a ni. Burnham hian thlawptu a ngah tak em avangin mi dang tan khin let a huphurhawm dawn a, nomination theh luh dang pawh an la awm lo. Party hruaitu dinhmuh chuh tuma sawi zinga mi, defence minister hlui Al Carns chuan Burnham hi khin a tum loh thu a lo sawi tawh bawk.

Burnham chuan an party MP tam zawkin an thlawp chu lawmawm a ti hle tih sawiin, hei hian Britain politics-ah kalphung thar neih a ṭulzia a tilang hle a ni, a ti. Nomination hi July 16 thleng hawn a ni dawn a, chuhtu dang an awm loh chuan July 16-ah Burnam hi Labour party hruaitu thar atan puan a ni ang a, July 20-ah King Charles III hmuin prime minister thar atan lak luh a ni ang.

Britain PM Starmer chuan thla hmasa khan amah thlaktu tur thlan a nih veleh prime minister a nihna aṭanga a ban tur thu a lo puang tawh a ni. Kum 2024 inthlanah hneh taka thlan tlin ni mah se, kum hnih vel thuneihna a chan hnuah a policy avang leh, local election-an an party a chakpui zawh loh avangin mipui bakah an party chhung ngei aṭangin duh khawp lohna a lian tawh hle a, sawisep pawh a tawk fo a ni.

Labour party hruaitu leh PM thar tura beisei, Andy Burnham hi Great Manchester mayor a ni a, “King of the North” tia sawi a ni ṭhin a, Labour party member zingah pawh a lar ber zinga mi a ni. Tun hnai thlengin MP a nih loh avangin party hruaitu dinhmun hi a chuh ve thei lo a, mahse June thlaa Greater Manchester-a House of Commons member thlanna, by-election neihah thlan tlin a ni ta a, Labour party hruaitu dinhmun hi a chuh ve thei ta a ni.