China-ah thlipui tleh vangin mi mtd 2 dawn sawn chhuak

China ramah thlipui na tak, typhoon Bavi tleh vangin Inrinni khan mi maktaduai hnih dawn chu hmun him lamah sawn chhuah an ni.

Typhoon Bavi hi Inrinni khan darkar khata km 1,000-a nain tuipui kam, Touizou khuaah a tleh a, zan lamah Wenzhou lamah a tleh leh zui bawk. An ram hmar thlang lam panin, thli nat lam pawh hi a ziaawm leh deuh a ni. Nimin zing khan Zhejiang province-a Haangzhou City a thleng a ni. Khaw chin zirtute chuan vawiin hian Anhui lam panin, naktukah Shandong Peninsula lamah a tleh zui dawn niin an sawi.

State media chuan thlipui tleh dawn vang hian Zhejiang leh a ṭhenawm province ṭhenkhata cheng, mi mtd 1.7 chuang chu hmun him lamah sawn chhuah an ni tih a tarlang. Nimin khan Zhejiang-ah hian school, office leh pawn lama hnathawh chi hrang hrang kha a ni a, flight 400 leh train service eng ema zat tihtawp lailawk a ni bawk.

Thuneitute chuan mi mtd 10 vel chenna, Wenzhou khawpuiah thlipui tleh vang hian thingkung tam tak tluin, in chung pawh a la nasa tih an sawi. Mi sing tel chu sawn chhuah an ni. Beijing thuneitute pawhin venthawn thilah mi nuai khat vel chu insawn chhuak turin an lo hriattir lawk bawk a ni.

Typhoon Bavi hian kar liam Thawhṭanni khan Guam leh Northern Mariana Islands te pawh darkar khata km 290-a naa tlehin a lo nuai tawh a ni. China a thlen hma hian Japan-a Sakishima islands-ah a tleh bawk a, mahse a nat lam hi darkar khata km 144-ah a tlahniam.