Germany-a AfD party-in dan loa lutte hnawh chhuah tiam

Germany-a 'far-right' party, Alternative for Germany (AfD) chuan Inrinni khan an manifesto tlangzarhin, an ram khawchhak lam state-a inthlana neih tura hnehna an chang a nih chuan, thuneihna an chan aṭanga ni 100 chhungin dan loa an rama lutte hnawh chhuah an tiam.

September thlaah Saxony-Anhalt state-ah inthlan a awm dawn a, mipui ngaihdan laknah pawh AfD hian party lian zawkte aiin point 20 velin hma an hruai mek a ni. AfD candidate, Ulrich Siegmund chuan hnehna an chan rual an an hmalakna tur hrang hrangte tarlangin, thuneihna an chan aṭanga a minute khatna aṭangin dan loa lutte hnawh chhuah hna chu kalpui nghal a ni dawn tih a sawi. Dan loa an rama lutte chu a tam thei ang ber an hnawtchhuak dawn tih a sawi. Hemi rual hian himna zawnga raltlan lutte chu vantlang tana hna thawk turin a phut dawn tih a sawi a, thawk duh lote chu sorkar aṭanga ṭanpuina an dawn ṭhinte tihtawp sak an ni ang, a ti.

AfD hi raltlan duh lotu, Russia leh Donald Trump thlawptu a ni. Inthlan neih turah hian an tling a nih chuan, Indopui II-na hnua Germany state-a 'far-right' party sorkarna hmasa ber a ni dawn a ni. An ram chhung economy dinhmun te a ṭhat tawk loh avangin, rorellai party-ten sawisel an hlawh a, hei vang hian AfD hi tun hnaiah a lar chak hle. Europe ram dangah pawh far-right party hian ngaihven an hlawh chho hle a ni.

Kum 35 mi, Siegmund chuan an party chuan chhungkaw awmphung pangngai -"mipa, hmeichhia leh an fate" chauh chu an thlawp tlat dawn thu a sawi bawk. Sikulah anpui kawpte thlawpna lantirna leh, LGBTQ+ rainbow flag tar a khap dawn thu sawiin office leh sikul-ah chaun an hnam puanzar chauh zar a ni ang, a ti. Sikula history zirlaibu pawh thlak a tum thu sawiin, Germany-in Nazi hunlaia an thil lo tihsual chungchang thlurbing lutuk chu a ṭha lo a, anmahnia inthiam lohna siam zawnga kalpui chu a duh lo tih a sawi bawk.